Coimisiún a bhí ann ó Ealaín na Gaeltachta, an comhlacht páirtnéireachta atá á reachtáil ag Údarás na Gaeltachta i gcomhar leis An Chomhairle Ealaíon. Bunaíodh an comhlacht leis na healaíona a chur chun cinn sa nGaeltacht.

Chuir Ealaín na Gaeltachta maoiniú airgid ar fáil le taighde a dhéanamh ar na rannta, le ceol nuachumtha a chumadh le cur leo, le cóiriú agus taifeadadh a dhéanamh ar na rannta agus leis an dlúthdhiosca a tháirgeadh. Thacaigh Bord na Leabhar Gaeilge le foilsiú an leabhair. An stiúideo beochana agus maisithe Cartoon Saloon, atá lonnaithe i gCathair Chill Chainnigh a rinne maisiú ar an leabha.

Tá saothar seisear ealaíontóir ar fad le feiceáil ann, ó thús deiridh. Cainteoirí dúchais Gaeilge ó cheantar Chonamara atá le cloisteáil ar an taifeadadh, iad ag rannaireacht, ag gabháil fhoinn agus ar thraic amháin, ag portaireacht. Ina measc tá an t-aisteoir aitheanta Tom Sailí Ó Flaithearta, fear a bhfuil aithne mhór in Éirinn air i bpáirt Chóilín sa sobaldráma Ros na Rún ar TG4. Glór eile a chloistear ann ná Caitlín Ní Chualáin, amhránaí agus craoltóir le Raidió na Gaeltachta. Craoltóir eile de chuid an stáisiúin sin, Meaití Jó Shéamais, a chloistear ag portaireacht agus ag píobaireacht ann.

Agus ar ndóigh tá na gasúir féin ann ˆ beagnach dhá scór acu san iomlán, ó dhá bhunscoil i gConamara ˆ Scoil an Chnoic, scoilín bheag bhídeach i gCeantar na nOileán (naonúr atá ar na rollaí i gcomhair scoilbhliain 2005–06!) agus Scoil Sailearna in Indreabhán, an bhunscoil is mó i nGaeltacht Chonamara.

Is é Tadhg Mac Dhonnagáin a chuir an togra Gugalaí Gug i dtoll a chéile. Is é a stíuraigh na rannairí sa stiúideo agus is é a scríobh an leabhar agus a rinne coimisiúnú ar an obair ealaíne. John Ryan a bhí mar léiritheoir, innealtóir, cóiritheoir agus cumadóir ar an taifeadad.

Seo an tríú togra do pháistí atá curtha i gcrích as láimh a chéile ag Tadhg agus John.